Makuzi na Hatua za Maisha katika Utamaduni wa Kiswahili

Isack, Zainabu Kassu

大阪大学大学院言語文化研究科

Utamaduni wa Kiswahili

Utamaduni ni jumla ya mila, desturi na mitindo ya maisha ya watu wa jamii fulani. Utamaduni unaangalia namna watu wanavyofanya mambo yao kwa kawaida kama vile; wakati gani au nini wanakula, mavazi yao, wanasalimiana vipi, mambo ambayo ni adabu, miiko yao, mambo wanayoamini n.k. Mambo ambayo yanaweza kuutambulisha utamaduni wa watu wa jamii fulani ni mengi na anwai, kujaribu kuyazungumzia yote kwa kina na mapana yake katika makala fupi kama hii ingekuwa ni kazi isiyo na tija. Dhati ya makala hii basi, ni kuangazia kipengele kimoja tu cha utamaduni wa Kiswahili; Makuzi na Hatua za Maisha katika Utamaduni wa Kiswahili. Ufafanuzi wa kipengele hicho unakusudiwa kuwanufaisha wakufunzi na wajifunzaji wa Kiswahili kama lugha ya kigeni. Msukumo wa kazi hii umetokana na changamoto za mwandishi katika uzoefu wake wa ufundishaji wa lugha ya Kiswahili na utamaduni wake kwa wanafunzi wageni. Changamoto hizo hasa ni kutokana na uhaba wa zana za kufundishia, hususan rejea zinazohusu maarifa juu ya utamaduni wa Kiswahili, zinazowalenga wajifunzaji na wafundishaji wa Kiswahili kama lugha ya kigeni. Ni dhahiri kuwa tunapojifunza lugha ya kigeni tunajifunza utamaduni wake pia, hivyo umuhimu wa kuwa na rejea za maarifa ya utamaduni wa jamii ya wazungumzaji wa lugha ya Kiswahili ni jambo linalohitaji kupewa uzito katika maandishi ya Kiswahili. Kazi hii ichukuliwe kama chachu tu ya kuhamasisha uandishi wa kina na endelevu juu vipengele vingine vinavyotuangazia maarifa juu ya utamaduni wa Kiswahili na utamaduni wa Kiafrika kwa ujumla.